ଅଷ୍ଟମ ଅନୁସୂଚୀରେ ହୋ ଭାଷା ସାମିଲ ପାଇଁ ଜାତୀୟ ସ୍ତରୀୟ ଗଣଧାରଣା — ୫ ରାଜ୍ୟରୁ ୫୦୦ ଅଧିକ ପ୍ରତିନିଧିଙ୍କ ଯୋଗଦାନ
କେନ୍ଦ୍ର ସରକାରଙ୍କ ଅବହେଳାରେ ହୋ ଭାଷା ବିଲୁପ୍ତି ପଥରେ — ହୋ ସମାଜର ନେତାଙ୍କ କ୍ଷୋଭ ପ୍ରକାଶ
ଭୁବନେଶ୍ୱର :- ସର୍ବ ଭାରତୀୟ ହୋ ଭାଷା କ୍ରିୟାନୁଷ୍ଠାନ କମିଟି ତରଫରୁ ଆଜି ଏକ ଦିବସୀୟ ଗଣଧାରଣା ଅନୁଷ୍ଠିତ ହେଲା, ଯାହାର ଉଦ୍ଦେଶ୍ୟ ହେଉଛି ହୋ ଭାଷାକୁ ସମ୍ବିଧାନର ଅଷ୍ଟମ ଅନୁସୂଚୀରେ ସାମିଲ କରିବା ପାଇଁ ଦାବି ଜଣାଇବା।
ଓଡିଶା, ଝାରଖଣ୍ଡ, ପଶ୍ଚିମବଙ୍ଗ, ବିହାର ଓ ଆସାମରୁ ଆସିଥିବା ୫୦୦ରୁ ଅଧିକ ହୋ ଭାଷା ପ୍ରେମୀ, ସାମାଜିକ ଓ ରାଜନୈତିକ ନେତାମାନେ ଏହି ଆନ୍ଦୋଳନରେ ଯୋଗଦେଲେ। ହୋ ଭାଷା, ଯାହାକି ଭାରତରେ ୪୦ ଲକ୍ଷରୁ ଅଧିକ ଲୋକ ମାତୃଭାଷା ଭାବେ ବ୍ୟବହାର କରନ୍ତି, ସେଥିପାଇଁ ଦୀର୍ଘଦିନ ଧରି ସରକାରୀ ମାନ୍ୟତା ଦାବି ଚାଲିଆସୁଛି।
ବକ୍ତାମାନେ କହିଥିଲେ ଯେ, ଝାରଖଣ୍ଡ ଓ ଓଡିଶା ସରକାର ହୋ ଭାଷାକୁ ସରକାରୀ ମାନ୍ୟତା ପାଇଁ ସୁପାରିଶ କରିଥିଲେ ମଧ୍ୟ କେନ୍ଦ୍ର ସରକାର ଏପର୍ଯ୍ୟନ୍ତ ଠୋସ ପଦକ୍ଷେପ ନେଇନାହାନ୍ତି। ସେମାନେ ଆଶଙ୍କା କଲେ ଯେ, ଯଦି ସମୟୋଚିତ ପଦକ୍ଷେପ ନ ନିଆଯାଏ, ତେବେ ହୋ ଭାଷା ସହ ଜଡିତ ପାରମ୍ପରିକ ଜ୍ଞାନ ଓ ମୈଖିକ ସଂସ୍କୃତି ଲୁପ୍ତ ହୋଇ ଯିବ।
ଏହି ଗଣଧାରଣାରେ ରାମରାଇ ମୁନ୍ଦୁଇୟା, ଲକ୍ଷ୍ମୀଧର ସିଂ, ସୁରା ବିରୁଲୀ, ଡମ୍ବରୁଧର ଜାମୁଦା, ନାରଣ ପୂର୍ତ୍ତି, ପ୍ରହ୍ଲାଦ ପୂର୍ତ୍ତି, କ୍ଷିରୋଦ ହେମ୍ବ୍ରମ, ଗୋମେୟା ଅମଂ, ରମେଶ ବିରୁଆ, ଇପିଲ ସାମାଡ ଓ ଗବର ସିଂ ହେମ୍ବ୍ରମ ଆଦି ନେତାମାନେ ନେତୃତ୍ୱ ନେଇଥିଲେ।(PNS)
